كيف يمكن ان نتفادى غدر من نأتمنهم على اسرارنا و حياتنا ملخص كتاب كليلة و دمنة بن المقفع

. ..... بصفة عامة، الحيوانات جد لطيفة و ذكية ناقصها غير اللسان باش تعبر ، و الكتاب اللي اخترت ليكم اليوم، نطقها و كلمها ، و هو عبارة عن قصص و حكايات على لسان الحيوانات. كتاب جد غني و مميز، و ضروري خاصنا نقراوه في صغرنا و في كبرنا، حيث عمرنا ما نملو منو. هاد الكتاب هو كليلة و دمنة، لعبد الله بن المقفع.. عبد الله ابن المقفع كاتبٌ شهير من العصر العباسي، و ما أدراك َما العصر العباسي، شعر و ادب و صالونات و سياسة... و هو من أصل فارسيّ ، اسلم، لقب بابن المقفع حيث الاب ديالو سرق و لمن سرق من خزينة أبي الحجاج الثقافي، ما لقى من يسرق غير ابي الحجاج الثقافي، ضربو على يدو حتى تنفخات، و ورمات ومن تم عطاوه اللقب ديال المقفع.. ...و بالتالي عبد الله بن المقفع.. اما كليلة و دمنة رآها في الأصل هي قصة الفيلسوف بيدبا ، اللي حكى قصة عن ملك هندي يدعى دبشليم طلب من حكيمه اللي هو الوزير ديالو باش يؤلف له كتاب فيه الحكم بطريقة مسلية، وهو يسافر و جمع ليه هاد الكتاب. و بكثرة الأهمية ديالو ترجم إلى عدة لغات، و منها العربية على يد عبد الله بن المقفع، لكن راه مشي غير ترجمو، راه زاد فيه و نقص منو. الكتاب تدار بالهندية، و حولو عبد الله بن المقفع إلى اللغة العربية و دخل عليه إضافات و تعديلات على حساب العصر و الظروف السياسية اللي هو عايش فيها ، حيث حتى هو راه باغي يوصل شي كليمات... و راه كتاب واش من كتاب، من أهم الكتب التي عرفها تاريخ الأدب العربي والتراث، كله رموز، وكلام غير مباشر، تقول اللي بغيتي بطريقة فنية، والفاهم يفهم.. و عبد الله بن المقفع، في صدد التغييرات اللي دار، ، ركز بزاف على العناصر الأساسية ديال الخطاب، وهي المرسل و الرسالة و متلقي الرسالة.. و ركز كذلك على الهدف ديال هاد الكتاب.. ضاف الكثير للنسخة العربية، ومن بين هاد الإضافات بعض الخصائص، والسمات الفنية. بحال مثلا عنصر الحوار. في جميع الحكايات اللي دارها ابن المقفع هي عبارة عن حوار بين الحيوانات، بطريقة فيها وضوح و احساس و مشاعير، و تفاعلات.. الحكايات تدور حول قضايا معينة، كتنتهي برسائل معينة على شكل حكم و أقوال... في صيغ متنوعة. وهاد الشي كيخلي القارئ متشوق لمعرفة النهايات و معرفة المزيد ، و يخليه يفكر بعييييييد... زيادة على الطريقة الذكية اللي ترجم بها الكتاب و اللي فيها العنصر الد يني واضح والتأثر بالثقافة الإسلامية واضح حتى هو... في المقدمة ديال بن المقفع، كنلاحظو انه مركز مزيان كما قلنا على المرسل و الرسالة و المتلقي، اما في المقدمات الآخرين ديال الفيلسوف بيدبا او الوزير الهندي مركزين على الظروف السياسية انذاك، والاقتصادية والثقافية اللي جعلت الوزير يجمع هاد الكتاب.. و نزيدكم هاد الكتاب عامر بالحكم، و الأمثال و َالمعانٍي ، فيه رسالة للقارئ يحلها و يفهمها كيف ما بغا.. اوا ندوزو لابواب الكتاب، و نمشيو بالضبط لباب الاسد و الثور.. باب الأسد الثور : قبل ما نحكيو القصة، نتعرفو بعد على الابطال ديال الكتاب... كاين كليلة و دمنة اللي هما أبناء آوى، صنف من الثعالب، كليلة ما به والو، داخل سوق راسو و في بعض الأحيان ملي كيشوف دمنة أخطأ او تصرف شي تصرف غلط كينوض له و كيعاتبو، ولكن دمنة ما كيحشمش و ما كيراعيش،اكبر شلاهبي في الكتاب، محتااال ، و محساد بزااف و ما يعرف غير المصالح الشخصية ديالو، اما النميمة فحدث ولا حرج، يمشي عند الاسد يقولو كلام، و يمشي عند الذئب يقلو كلام و يمشي عند التعبان يقولو كلام، النهار كامل وهو ينمم و هو يقلب على َمن يحكر و على من يحتال . و كاين الحيوانات الأخرى، الأسد اللي هو الملك و الثور و هو صديق الملك الوفي، و صداقثهم يضرب بها المثل..كاين كذلك النمر، اللبؤة و التعبان، و الغراب... كل شي الحيوانات كاينة و كلها و طبعو و كل واحد والتصرف ديالو.. أما الحكاية ديالنا ديال اليوم هي ما بين الثور و الأسد.. دمنة كان واحد من المقربين للاسد، كيستاشر معه في كل شي، و كيحكي ليه أسرار الغابة كاملة، و عندو ثقة كبيرة فيه، واحد النهار، هما جالسين و هو يسمع الأسد واحد الصوت كبير و مزعج، سول دمنة على صاحب الصوت واش قوي واش مزعج واش يقدر يخلق مشاكل في الغابة... قال لو دمنة، يا ودي هداك راه الثور، صوتو قوي ولكنه ضعيف جدا، وإذا بغيتي نجيبو ليك حتى لعندك، ديرو خادمك الخصوصي، يتسخر لك، و يقضي لك بعض المسائل. قالو الأسد جيبو، هادي حاجة مزيانة. و فعلا جا الثور عند الأسد، و تفاهممعه مزيان ، كان عند حسن ظنه، و ساعدو، و عجبو بزاااف، حيوان مطيع، خدوم، ظريف، و وفي.. وداخل سوق راسو، و بقات علاقتهم غاد و كتكبر حتى أصبح من اعز أصدقائه، الكلمة كلمتو و الشوار و شوارو، و الأسرار كلها بين يديه... هاد العلاقة قلقات دمنة الخبيث، و دارت فيه غيرة كبيرة تحولات لحسد ، وهنا بدا كيفكر كفاش يحيد عليه هاد الثور من الطريق. بما انه محتال، فيدا النميمة هي الأولى، كيمشي عند الأسد يقل لو راه سمعت ان الثور طمع في الملك ديالك و راه بدا كيخطط باش انت تحيد، و راه بدا كيجمع في الجنود و زيد وزيد، كل نهار يجيب للاسد كذبة. و نفس الشيء بالنسبة للثور، كيقل لو حضي راسك راني سمعت ان الأسد باغي يعرض على اصدقاؤو و باغي يديرك وليمة... المهم، الأسد ولا خايف من الثور، و الثور ولا خايف من الأسد..