كيف يمكن أن نستثمر الوقت و نستفيد منه دون أن نضيعه ملخص كتاب ادارة الوقت لابراهيم لفقي

كاين اللي ما عاطيش للوقت أهمية نهائيا مع الأسف هادو كثار، يقدر يعطيك موعد و ما يجيش، أو يتأخر على العمل ديالو و يمسحها في المواصلات... و في الظروف... ولكن كاين اللي كل شي عند و مضبوط... كيعرف ينسق بين العمل و العائلة و الرياضة وصلة الرحم... الفرق بين هاد الناس هو حسن إدارة الوقت...و ما عندكش علاش تشكي منو حيث في الحقيقة الوقت مادار والو، انت اللي خاصك تعامل معه بطريقة صحيحة.. و اعطيه القيمة الحقيقية اللي كيستحق . و ما تخليهش يغلبك، حيث اذا سيطر عليك الوقت كتولي مضارب معه، و كيولي هو يجري و انت تابعو. و اول حاجة خاصنا ندير ها باش ما نعيشوش في الطوارئ last minute او ما سماه الكاتب الفوضى المؤلمة، هو خاصنا نحيدو من القاموس ديالنا كلمة ما كاينش الوقت، حيث هاد الجملة كيعتبرها الكاتب خرافة. كاين الوقت، انت اللي ما عرفتش كفاش تستغلو. و لازم نعرفو بأن الناس و العالم و جميع الأمم اللي كتشوفهم ناجحين راه ناجحين بفضل استغلالهم الجيد للوقت ما عندهمش كلمة ما كاينش الوقت . كلنا عندنا نفس الوقت، نفس السوايع اللي عندي عندك و عند الجميع ، ولكن كل واحد فينا كيستهلكو بطريقتو، و المشكلة هي اننا ما كنستغلوهش بالطريقة الصحيحة، كنضيعوه في اشياء تافهة. فاستغلال الوقت بطريقة جيدة هو اهم مفاتيح النجاح. و الوقت عندو خصائص كثيرة... منها انه من ذهب، انه كالسيف ان لم تقطعه قطعك. هاد الخصائص كتبين لنا مدى أهمية الوقت و قداش هو ثمين و غالي و ما يمكنش نعوضوه، الوقت اللي مشا ما يمكنش يرجع ..... و هو اغلا ما نملك، و هو مورد من الموارد المحدودة، اللي اذا ما تعاملتيش معها بجدية تطير بحال البرق... و اذا عرفنا كفاش نستغلوه راه كتزيد القيمة ديالو.. كيشرح لنا الدكتور إبراهيم لفقي رحمه الله مفهوم إدارة الوقت، و كيقول بأن الأساس هو إمكانية إدارة حياتك ونفسك بنفسك. مشي يجي شي احد هو اللي يبرمج في مكانك، راه غادي يشوف غير مصلحتو. انت اللي خاصك تخطط للوقت ديالك و تسيطر عليه، و ما تخليهش يسيطر عليك، و أنت اللي خاصك تتحكم فيه بدل ان يتحكم فيك.ما تضيعوش! مثلا ما تعملش و انت تعبان و مرهق، راه نقدرو مثلا نعملو النهار كله، و لكن لا نعمل بالشكل الصحيح. و غادي يكون هداك الوقت ضائع . و بعد على الضغوط النفسية اللي كتاثر عليك و على الإنتاجيات ديالك... حيث بالضغوطات النفسية، غادي تولي تشتغل وقت طويييل ضائع بلا نتائج إيجابية.